"Чек араны тактап, завод-фабрика куруп, иш орун түзүп бербесе, мындай өкмөттүн кереги барбы" дейт депутат Карамат Орозова

"Завод-фабрика куруп, иш орун түзүп, элге жеңилдик кылып бербесе, бизге мындай өкмөттүн кереги барбы", - деди бүгүн, 13-сентябрда Жогорку Кеңештин жыйынында депутат Карамат Орозова.

Депутат Оштун Ноокат району менен Баткендин Кызыл-Кыя районунун ортосундагы талашка түшкөн "Кызыл-Кыя" цемент заводу боюнча маселени көтөрүп, өкмөттүн аракетин чабал деп кескин сынга алды.

"Мен мурда да парламентте көтөрүлгөн, талаш-тартыш жараткан "Кызыл-Кыя" цемент заводу менен Ноокаттын ортосундагы маселени кайра көтөрүп чыгайын. Өкмөттүн 2018-жылдын 13-июнундагы 284-токтому чыккан. Бул токтом чыккандан кийин Баткен облусунун Кызыл-Кыя шаарынын элинде аябай нааразычылык жаралган. Шаардык кеңештин депутаттары, аксакалдар келгенде өкмөт аларды кабыл албай койгон.

Палатада 6 депутат маселе көтөрүп чыгып, чындыгында туура эмес экенин айтканбыз. Андан соң өкмөттүк аппараттын жетекчиси келип токтомду чакыртып алганын айткан.

Эми мага дагы кат келди. Ошончо элдин, 120 депутаттын алдында чакыртып алдым деп туура эмес маалыматты окуп коюптур. Маселе минтип чечилбейт да. Цемент заводдун үлүшү Ноокат менен Кызыл- Кыянын ортосунда 50/50 деп саясий чечим кабыл алынган болчу. Муну азыркы президентибиз өзү кабыл алган, азыркы өкмөт ошого каршы чыгып жатканы мени өкүндүрөт. Элибиз нааразы болуп жатышат, туруктуулукту сактайлы десек, өкмөт өздөрү чыгарып жатышат.

Азыр ишкер көп, эл өкүлдөрүнүн арасында деле ишкерлер көп. Өкмөт аларга жер, насыя берсин, Ноокат цемент заводу деп куруп коёт. Сөзсүз түрдө заводду Баткенден тартып алышы керекпи? Баткен облусу жаш облус, жардам бергендин ордуна тартып алуунун эмне кереги бар? Баткен облусунда ансыз да чек ара көйгөйү чегине жетип турат, чек араны тактап бербесе, элге иш орун түзүп завод-фабрика куруп бербесе, элге жеңилдик кылбаса, бизге мындай өкмөттүн кереги барбы же жокпу? Өкмөт азыр бюджетке түшкөн акчаны каалагандай калчап, каалагандай буйрукту чыгарып жатат.

Жогорку Кеңеште бул боюнча комиссия түзүлсүн жана "Кызыл-Кыя" цемент заводун Баткен облусуна кайтарып берсин", - деди Орозова.