Бишкекте эл аралык диний-илимий конференция өтүүдө

Бишкек шаарында "Руханий Жибек жолу. Улуу гуманисттик салттар жана азыркы учурдун чакырыктары" аталышындагы III эл аралык диний-илимий конференция өтүүдө. Бул тууралуу бүгүн, 13-сентябрда Кыргыз мусулмандар дин башкармалыгынын маалымат кызматынан билдиришти.

Эл аралык конференцияга Кыргыз, Орусия, Казакстан, Өзбекстан, Тажикстан, Эстония, Литва мамлекеттеринин муфтийлери, дин иштери боюнча мамлекеттик комиссиясынын өкүлдөрү, дин аалымдары жана серепчилер катышууда.

Үчүнчү эл аралык диний-илимий конференциянын ачылышында муфтий Максатбек Токтомушев конференцияга катышуучуларына ыраазычылыгын билдирип, бул иш-чаранын Кыргыз жеринде өтүп жаткандыгы чоң сыймык экендигин баса белгиледи.

Конференциянын жүрүшүндө катышуучулар терс диний агымдардын алдын алуу, басылмаларга анализ жүргүзүү жана дин башкармалыктарынын коомдогу орду боюнча докладдарды окуп, өздөрүнүн сунуш-пикирлерин билдиришүүдө.