Миграция кызматы: "Памирликтер Кыргыз паспортун алууга кызыкдар эмес"

Памирликтер Кыргыз паспортун алууга кызыкдар эмес. Бул тууралуу Мамлекеттик миграция кызматынын кайрылмандар боюнча бөлүмүнүн жетекчиси Жыпар Мамбетова 14-сентябрда өткөн маалымат жыйында билдирди. Анын айтымында, Кыргыз паспортун алуу боюнча буга чейин каалоолору болгон эмес.

"Кыргыз өлкөсү тараптан да маселе көтөрүлө элек. Өздөрүнүн да каалоосу жок. Анткени алар кайра эле Памирге барып турууну каалашат", - деди Мамбетова.

Ал эми каникул учурунда өз жерине кеткен 18 памирлик Кыргыз жерине кайтып келе электигин кошумчалады. "Каникул учурунда туугандары менен учурашып, өз иштерин бүткөрүү үчүн кеткендер азырынча кайтып келе элек. Кечээ биз менен байланышып, виза алуу маселеси менен алек болуп жатышканын айтышты. Сентябрь айынын аягында келип калышат экен. Ал эми Кыргыз өлкөсүнө таарынып кетип калганы боюнча маалыматтар чындыкка жатпайт", - деди Мамбетова.

2017-жылы өлкөгө Кичи жана Чоң Памирден 6 үй-бүлө, тагыраагы, 33 этникалык кыргыз келген. 2018-жылдын февралында дагы эки үй-бүлө көчүп келген эле. Кийин 9-июлда 18и Памирге кайтып кетишкен.