Тарых музейиндеги коррупция: 118 миллион сом уурдалган, бирок бир да адамга айып тагыла элек

"Тарых музейиндеги мыйзамсыз иштер боюнча кылмыш иши качан козголгон, кимдердин тиешеси бар? Ким кымбат таштарды уурдап кеткен?" деп сурады депутат Алмамбет Шыкмаматов фракция жыйынында.

Ал тергөө иштери узарып жатканын эскертти.

"Иликтөө иштери 13-октябрга чейин узартылды. Тергөөнү УКМК жүргүзүп жатат. Мен кимдердин тиешеси бар экенин айта албайм", - деди башкы прокурордун орун басары.

Маалыматка караганда, музейдеги мрамордун 300 чарчы метрден ашыгы СМУ-3 компаниясында турат. Гранитттин 1600 чарчы метри онкология борборуна иштетилген. 405 чарчы метри СМУ-3тө сакталууда.

УКМКнын маалыматы боюнча, эсептөө палатасы текшерүүнү аягына чыгара элек. Алдын ала эсептөө боюнча 118 миллион сом акча каражаты мыйзамсыз пайдаланылган. Бирок укук коргоо органдары бир да адамга айып тага элек.