Ырчы Айтурган Эрмекова "Темур" аталышындагы тасмага тартылды

"Кыз-Бурак" тобунун мурдагы солисти, учурда жеке ырчы катары чыгып жаткан Айтурган Эрмекова өзбек тасмасына тартылып, актрисалык тушоосун кести. Бул тууралуу ырчы SUPER.KG порталына маалымдады.

"Өзбекстандын "Темур" аталышындагы тасмасында башкы ролдордун бирин жараттым. Тасма тартылып, көрөрмандардын назарына коюлду. Буюрса, сентябрь айынын аягында аталган тасманын 2-сезону тартылат. Бул тасмада роль жаратып калышыма өзбекстандык актёр Мирза Азизов себепчи болгон. 1 жыл мурда биздин өлкөгө Өзбекстандан маданият өкүлдөрү келип, Кыргыз жергесинде 10 күндөн ашык жүрүп кетишкен. Кетип жатканда Мирза Азизов мага "Сенин талантың бар экен, тасмага тартылып көрбөйсүңбү? Жакында жаңы тасма тартабыз. Андагы башкы каармандын ролуна сен ылайыктуу экенсиң" деди. Мен мындай сунушту укканда макул болдум. 1 аптадан кийин Мирза Азизов байланышка чыгып, тасмага тартылууга чакырды", - дейт ырчы.

Ырчы Айтурган Эрмекова тартылган тасма мекени үчүн күйгөн жигиттин жашоосун чагылдырат. "Темур" тасмасына өзбекстандык Алихан Юсупов, орусиялык белгилүү актёр Игорь Жижикин, казакстандык Саят Исембаев тартылган. Аталган тасманын бет ачары Ташкент шаарында өткөн.

Айтурган Эрмекова "Кыз-Бурак" тобунда 2008 жана 2014-жылдары ырдаган. Кийинчерээк топтон кеткенден кийин жеке ырчы катары чыккан. Репетуарында "Апакем", "Махабатым", "Сен менен", "Сени таптым" жана башка чыгармалары бар.