Текебаев, Шыкмаматов жана Салянованын "Мегакомдо" үлүшү бар деген маалымат тастыкталбады. УКМК Белизден келди деп Сегизбаев Атамбаевге көрсөткөн документ жок экенин айтты

2016-жылы Белиз өлкөсүнөн Өмүрбек Текебаев, Алмамбет Шыкмаматов, Аида Саляновага байланыштуу кат келген. Бул тууралуу депутат Алмамбет Шыкмаматов "Ата Мекендин" жыйынында билдирди.

Маалыматка караганда, ал катта жогорудагы 3 саясатчынын "Мегаком" компаниясында 8 пайыздан үлүшү бар деген маалымат жазылганы айтылган.

Аталган маселе каралып жатканда башкы прокурордун орун басары мамлекеттик сыр айтылат деп журналисттерди сыртка чыгарууну суранды. Бирок Шыкмаматов анын бул суранычын четке какты.

"Маалыматтарды айтпасаңар койгула. Мамлекеттик сыр болуп калдыбы? Абдил Сегизбаев телевизордон айттырып эле жатпады беле. Маалыматты жашырсаңар анда силер да кылмышка шерик болосуңар", - деди Шыкмаматов.

УКМКнын өкүлү Аида Салянова, Алмамбет Шыкмаматов, Өмүрбек Текебаевдин "Мегакомдо" үлүшү бар деген Белизден келген документ жок экенин айтты. Ал эми ушул маселе боюнча УКМКнын өкүлү Мусаканов Белизге барып, документти алып келгени боюнча маалымат жалган экени белгилүү болду.