"Белизгейт" чыры эми Абдил Сегизбаевге иш козготушу мүмкүн. УКМКнын мурунку жетекчисинин туура эмес маалымат таратканы боюнча парламентте отчёт берилет

"Абдил Сегизбаев "Белизгейт" боюнча маалыматты парламентте айткан". Мындай пикирин депутат Алмамбет Шыкмаматов "Ата Мекен" фракциясынын жыйынында билдирди.

Ал Сегизбаевдин маалыматы туура эмес болуп чыкканын айтып, бул үчүн жооп бериши керек дейт.

"УКМКнын мурунку башчысы Абдил Сегизбаев Өмүрбек Текебаев, Алмамбет Шыкмаматов, Аида Салянованын "Мегакомдо" үлүшү бар деген маалыматты парламентке келип айткан. Келерки шаршемби, Жогорку Кеңештин жалпы жыйынында анын маалыматы жалган болгонун, Белиз өлкөсүнөн эч кандай документ келбегенин айткыла. Муну эл билиши керек. Жыйынга баш прокурор өзү да келсин. Баяндаманы сиз (баш прокурордун орун басары - ред.) жасаңыз. Фракция бүгүн ушундай чечим кабыл алдык", - деди Шыкмаматов.

2016-жылдын 14-ноябрында ал кездеги президент Алмазбек Атамбаев УКМКнын төрагасы Абдил Сегизбаевди кабыл алган. Анда Белиз мамлекетинин расмий органдарынан апостиль алынганын билдирген. УКМКнын башчысынын билдиришинче, ал документтер 2012-жылы жогорку кызматта турган 3 адам "Мегакомдун" акцияларын сатуудан түшөт делген 50 миллион доллардан ашык акчаны оффшордук компанияга чыгарууга кызыкдар болгонун күбөлөндүрөт. Документте Өмүрбек Текебаевдин, Алмамбет Шыкмаматовдун жана Аида Салянованын аты аталган.