Тырмооч кармаган чоңдор, таштанды чогулткан аскерлер... Өлкөдө өткөн массалык ишембиликтен фоторепортаж

15-сентябрь – Бүткүл дүйнөлүк тазалык күнү. Бул күндүн алкагында Бишкек шаарында жана өлкөнүн 7 дубанында ишембиликтер болуп өттү. Ага президент, өкмөт башчы, министрлер, шаар мэрлери, мамлекеттик кызматкерлер, жеке компаниялардын кызматкерлери, студенттер жана башка жарандар катышты. Республика боюнча жалпысынан акцияга 400 миңге жакын адам катышып, 4 миллион килограммдан ашуун таштанды чогултту.

Ким кандай иштегенине жана кайсы жерлерде тазалоо иштери кызуу жүргөнүнө кызыгып көрдүк.

Өлкө башчы Сооронбай Жээнбеков, премьер-министр Мухаммедкалый Абылгазиев, Бишкек шаарынын мэри Азиз Суракматов жана президенттик аппараттын кызматкерлери Бишкектеги Энвер Гареев атындагы Ботаникалык сейил бактын аймагын тазалашты.

Ички иштер министрлигинин кызматкерлери дагы бул иш-чараны кайдыгер карап турган жок. Алар да ишембиликке чыгып, шаарды тазалоо иштерине жигердүү катышышты.

Саламаттыкты сактоо министрлигинин башкы аппаратынын кызматкерлери Юлиус Фучик атындагы сейил бактын айланасын таштандылардан арылтты.

Өзгөчө кырдаалдар министрлигинин жамааты Бишкек шаарындагы Чоң Чүй каналынын жээгин жана министрликтин имаратынын айланасын тазалашты. Ал эми өлкө боюнча жалпысынан 4 миңден ашуун ӨКМнын кызматкерлери жана куткаруучулар жалпы ишембиликке катышты.

Эмгек жана социалдык өнүгүү министрлигинин жамааты да бул иш-чараны колдоого алышты. Бул мекеменин 50дөн ашык кызматкери Бишкек шаарынын жогору жагындагы панорамага барып таштандыдан арылтты. Министрликтин кызматкери Асема Куттубаева алар тазалаган жерде тазалыкка көп көңүл бурулбаганын айтты.

“Жаштардын көбү панорамага барышат, бирок таштандыларды ала кетпей калтырып кетишет экен. Биз аз эле убакытта 215 кап таштанды чогулттук. Биздин катарга ошол аймакта жашаган тургундар, окуучулар өз ыктыяры менен кошулуп, жардам беришти”, - деди Куттубаева.

Ишембиликтен жеке менчик компаниялар да четте калган жок. "Билайн" компаниясынын жамааты Бишкектеги "Мадина" базарынын жанындагы 7-Апрель көчөсүнүн жээгин жана арыктарды таштандылардан тазалады. Жалпысынан "Билайндын" 130га жакын кызматкери ишембиликке чыгып, өлкөнүн тазалыгына салым кошушту.

Ошондой эле "Билайндын" Жалал-Абаддагы кызматкерлери ишембиликке чыгышты.

Аталган компанияда программист болуп эмгектенген Курманбек өлкөнүн тазалыгы үчүн ар бир жаранды кол кабыш кылууга чакырып, шаар таза болсо элдин да ден соолугу чың болорун айтты.

"Биздин компания тазалык күнүнө карата өтүп жаткан шаарды тазалоо демилгесин чын дилибизден колдоп келдик. Буга чейин да коомду жакшы жакка үндөгөн иш-чараларга катышып келгенбиз. Мындан ары ушундай иш-чаралар байма-бай өткөрүлүп, ага ар бир адам жигердүү катышса дейт элем. Айлана-чөйрө таза болсо, жарандарыбыздын да ден соолугу чың болот. Шаарыбыз да көрктүү болот", - деди ал.

"Бүткүл Дүйнөлүк тазалык күнү" акциясы "Эко Деми" коомдук фондунун демилгеси менен уюштурулду. “Биз дүйнөнү тазалайбыз!” деген ураан менен бул иш-чара дүйнөнүн 157 мамлекетинде уюштурулду. Кыргыз өлкөсүндө аталган саамалык алгачкы жолу өтүүдө.