Алмазбек Атамбаевге "Ак Шумкар" өзгөчө белгиси Тарых музейинин ачылышында тапшырылат. Бирок ал качан ачылары белгисиз

Экс-президент Алмазбек Атамбаевге "Кыргыз Республикасынын Баатыры" наамын алгандарга берилчү "Ак Шумкар" өзгөчө белгиси Тарых музейинин ачылышында тапшырылат. Бул тууралуу SUPER.KG порталына КСДПнын өкүлү Кундуз Жолдубаева билдирди.

Маалыматка караганда, "Ак Шумкарды" музейдин ачылышында тапшыруу жаз мезгилинде эле такталган.

"Жазда экс-президентке "Ак Шумкар" өзгөчө белгисин Тарых музейинин ачылышында тапшыруу боюнча сүйлөшүлгөн. Бирок ал качан ачылары анык эмес. Буюрса, Алмазбек Атамбаев сыйлыкты алуу иш-чарасына катышат", - деди Жолдубаева.

Маданият, маалымат жана туризм министрлигинин басма сөз кызматынын айтымында, Тарых музейи качан ачылары белгисиз.

Реконструкциядан өтүп жаткан Тарых музейинин ачылышы ушул жылдын 31-августуна белгиленип, жумуштун аягына чыкпаганына байланыштуу белгисиз мөөнөткө жылдырылган.

Президент Сооронбай Жээнбеков 2017-жылдын 24-ноябрда ант бергенден кийин президенттик кызматындагы биринчи жарлыгында экс-президент Алмазбек Атамбаевге "Кыргыз Республикасынын Баатыры" наамын ыйгарган. Ага ылайык, экс-президентке эң жогорку "Ак Шумкар" өзгөчө белгиси тапшырылышы керек эле.

13-сентябрдагы Жогорку Кеңештин жыйынында депутат Ирина Карамушкина экс-президентке жарлык чыкканына 1 жыл болоюн десе да "Ак Шумкар" тапшырылбаганын айтып чыккан.