Түркияда кыргыз жана өзбек кыздарын сойкулук менен алектенүүгө мажбурлаган 14 адам кармалды

Түркияда кыргыз кыздарын сойкулук менен алектенүүгө мажбурлаган 14 адам кармалды. Бул тууралуу бүгүн, 17-сентябрда жергиликтүү массалык маалымат каражаттары жазып чыкты.

Полиция кызматкерлери тарабынан Анталия жана Манавгат шаарларында кыргыз кыздарын жана Өзбекстандан барган кыздарды сойкулук менен алектенүүгө мажбурлаган жарандар колго түшүрүлдү.

Иликтөө иштеринин алкагында Анталияда кылмышка шектүү катары 9 жаран кармалган, алардын үчөө аял. Ал эми Манавгат шаарында З.Севкозиева жана Г.Мамажанова аттуу азербайжандык эки жаран кармалган. Алар шаар ичиндеги мейманкананын ээси менен биргеликте сойкукана иштетип келген. Аталган жайда кыргыз жана өзбек кыздарын сойкулук менен алектенүүгө мажбурлап келишкен.

"Полиция кызматкерлеринин жүргүзөн иликтөө иштеринин алкагында жалпы 10 аял куткарылды. Алардын ичинен 7си чет элдик жарандар. Учурда алар тиешелүү мекеменин кызматкерлерине өткөрүлүп берилди. Аз убакыттын ичинде алар өз мекендерине жөнөтүлмөкчү", - деп жазылат маалыматта.