Күрөш боюнча жаштар арасындагы Дүйнө чемпиондугу: Акжол Махмудов чейрек финалда жеңилүү ызасын тартып калды

Бүгүн, 17-сентябрда Словакиянын Транава шаарында грек-рим күрөшү боюнча жаштар арасындагы Дүйнө чемпиондугу өтүүдө. Анда кыргыз спортчулары 4 салмак ченинде күч сынашып жатат.

77 килограммга чейинки салмак ченинде Кыргыз өлкөсүнөн Акжол Махмудов катышып, чейрек финалда орусиялык Ислам Опиев менен күч сынашты. Беттештин жүрүшүндө Махмудов 1 упайды атаандашынын кыймылсыздыгы үчүн алып, партерден ыкма колдоно албай упай алган жок.

2-бөлүктө орусиялык балбан Махмудовдун кыймылсыздыгы үчүн 1 упайга ээ болуп, партерден жыйынтык чыгара алган жок. Муну менен беттеш соңуна чыгып, Орусиянын балбаны акыркы болуп упай алганы үчүн жеңишке жетип, жарым финалга чыкты. Ал эми Акжол Махмудов көңүл жубатуучу раундда күч сынашып, андан соң коло медалды утуп алууга аракет көрөт.

Айта кетсек, Эрбол Бакиров чейрек финалда атаандашын утуп жарым финалга чыкса, Нуртазин Керимберди уулу чейрек финалда азербайжандык Зулфугар Алыев менен кездешет.