"Макмал" кенинде алтындын кору түгөнүп, иш токтоду

“Макмал” алтын комбинатынын алтын ылгоо фабрикасы өз ишин токтотту. "Кыргызалтын" ишканасынын басма сөз катчысы Толкун Камчыбекованын SUPER.KG'ге кабарлашынча, “Макмалдагы” алтындын кору толук түгөндү.

Анын айтымында, мындан ары иштетүү экономикалык жактан пайдасыз жана чыгашалуу болуп эсептелет.

"Кен казып алуунун көрсөткүчтөрү боюнча “Макмал” алтын комбинаты чыгашалуу болгондуктан 2013-жылы эле жабылыш керек болчу. Бирок жалпы Тогуз-Торо району үчүн социалдык жактан олуттуу мааниге ээ болгондуктан “Макмал” алтын комбинатынын келтирген чыгашалары “Кыргызалтын” ачык акционердик коомунун башка филиалдарынын эсебинен толтурулуп келген. 2018-жылдын 1-сентябрынан тартып өндүрүш токтоду, 924 иш орундун ичинен 593 орун кыскартылды. Кыскартылган жумушчуларга тийиштүү компенсация толук өлчөмдө төлөнүп берилет", - деди Камчыбекова.

Басма сөз катчы 2018-жылдын аягында “Кыргызалтын” ишканасы “Макмал” алтын комбинатындагы кен чыккан жерди изилдөө, калдык сактоочу жайды кайра иштетүү үчүн сынак өткөрүүнү пландап жатканын кошумчалады.