Ошто 4-кабаттан ымыркайы менен кошо боюн таштаган келиндин окуясы. Дарыгерлер ымыркайдын өмүрү үчүн күрөшүүдө

Буга чейин 6-сентябрда саат 17:00 чамаларында Ош шаарына конокко келген келин колундагы 7 айлык баласы менен жатакананын төртүнчү кабатынан боюн таштаганы маалым болгон.

Азыркы тапта ымыркайдын абалы оор экенин Саламаттыкты сактоо министрлигинин басма сөз кызматы билдирди.

"Апасы менен кошо 4-кабаттан кулап түшкөн ымыркайга операция жасалды, бирок абалы оор. Дарыгерлер анын өмүрү үчүн күрөшүүдө. Ал эми келинди операцияга даярдап жатышат, анын жамбаш сөөгү сынып кеткен. Абалы туруктуу", - деп билдирди маалымат кызматы.

Алгачкы териштирүүнүн жыйынтыгында, жабырлануучу жолдошу менен Чүй облусунда жашап жатып, аны менен таарынышып кеткени аныкталган. Ал эки баласын кайненесине таштап, кичүү баласын колуна алып, август айынын ортосунан тартып Ошто жашаган бир тууган эжесинин үйүндө жашап жаткан.

Ошондой эле айрым күбөлөрдүн айтымында, күйөөсү менен пикир келишпестиктен улам келин спирт ичимдиктерин көп ичип жүргөндүгүн, окуя болгон күнү да алкоголдук ичимдиктерди ичкени белгилүү болгон.