Кытайдын Оштогу башкы консулдугу Жалал-Абад облустук милициясына 8 унаа белек кылды

Кытай Эл Республикасынын Ош шаарында жайгашкан башкы консулдугу тарабынан жардам иретинде Жалал-Абад облустук милициясына 8 унаа белекке берилди. ИИМдин маалымат кызматынан кабарлашкандай, ачкычтар 19-сентябрда министр Кашкар Жунушалиевдин катышуусунда тапшырылды. Белекке алынган унаалар Жалал-Абад облусундагы Тогуз-Торо, Чаткал, Токтогул өңдүү алыскы райондордо пайдаланылат.

Кашкар Жунушалиев унааларды тапшыруу учурунда эки өлкөнүн кызматташуусу жанданганын белгилеп, Кытай өлкөсүнүн Ош шаарында жайгашкан башкы консулдугуна ыраазычылыгын билдирди.

Андан сырткары облустук жана шаардык башкармалыктардагы, борбордук аппараттардагы штаттык бирдиктер кыскартылып, анын ордуна аймактарда штаттык орундар көбөйгөнүн кошумчалады.

Унааларды тапшыруудан кийин министр Базар-Коргон районундагы Арстанбап аймактык милиция бөлүмчөсүнүн ачылышына катышты. Бул 4 бөлмөлүү болгон милиция бөлүмү да Кытай өлкөсүнүн Ош шаарындагы башкы консулдугунун колдоосу менен курулган.