Чемпиондор Лигасында алгачкы жолу Кыргыз жеринде туулган футболчу оюнга чыкты

Чемпиондор Лигасынын негизги бөлүгүндө алгачкы жолу Кыргыз жеринде туулган футболчу оюнга чыкты.

19-сентябрдан 20-сентябрга караган түнү Чемпиондор Лигасынын топтук этабында чехиялык "Виктория" клубу орусиялык "ЦСКА" клубун кабыл алды. Оюндун 46-мүнөтүндө "ЦСКАнын" курамында алмашуу болуп, Дмитрий Ефремовдун ордуна Кыргыз жеринде туулган жарым коргоочу Ильзат Ахметов талаага чыкты.

Биринчи бөлүктүн жыйынтыгында, "ЦСКА" 2:0 эсебинде жеңилип жаткан. Ахметов оюнга чыккандан кийин москвалык клуб активдүү оюн көрсөтүп, 49-мүнөттө эсепти 1:2ге айланта алды. Оюндун 85-мүнөтүндө Ильзат Ахметовдун узаткан соккусу Тимур Жамалетдиновдун бутуна тийип, андан соң атаандаштын дарбазасынан орун алды. Бирок айып аянтчада эреже бузулду деп эсептеген башкы калыс голду эсептеген жок.

Ага карабай "ЦСКА" 95-мүнөттө 11 метрлик айып аянтчасынан гол жаратып, оюн 2:2 эсеби менен жыйынтыкталды.

Оюндан кийин Ильзат Ахметов орусиялык телеканалдардын бирине пикирин билдирип, жеңишке бир кадам жетпей калганын белгиледи.

"Оюндун жүрүшүнөн улам тең чыгуу биз үчүн артыкчылык болду десек болот. Утулуп жаткан учурда гол киргизүү абдан кыйын. Бирок биз эсепти теңеп, өзүбүздүн мүнөзүбүздү көргөзө алдык. Балким, биз жеңишке татыктуу ойной албаганыбыз үчүн тең чыгуу болду. Алдыңкы оюндардан мындан жакшы ойноп, машыктыруучунун айткандарын толугу менен аткарууга аракет кылабыз", - деди Ахметов.

Ильзат Ахметов 1997-жылы Бишкек шаарында туулган. 2014-жылга чейин казандык "Рубин" клубунун ар кайсы жаш курактагы резервдик командаларында ойногон. 16 жашында "Рубиндин" негизги курамында оюнга чыгып, казандык клубдун негизги курамында ойногон эң жаш оюнчу аталган. 2018-жылдын июль айында "ЦСКА" клубу менен 4 жылдык келишим түзүп, жаңы сезондо москвалык клубдун курамында 7 оюн өткөргөн.