Автомектепти бүтүргөндөр 6 айга чейин сынак тапшырбаса айдоочулук күбөлүк берилбейт

Мындан ары автомектепти бүтүрүп, 6 айга чейин сынак тапшырбаган жарандарга айдоочулук күбөлүк берилбейт. Бул тууралуу Өкмөттүн маалымат кызматы маалымат таратты.

"Премьер-министр Мухаммедкалый Абылгазиев улуттук үлгүдөгү айдоочулук күбөлүктөрдү берүүдө коррупциялык элементтерди жокко чыгаруу, жол кыймылынын коопсуздугун камсыздоо максатында Өкмөтүнүн айрым чечимдерине өзгөртүүлөрдү киргизүү жөнүндө токтомго кол койду.

Токтомго ылайык, автомектепте окугандыгы тууралуу күбөлүктүн мөөнөтү 6 айды түзөт. 6 айдын ичинде тийиштүү органдарга экзамен тапшырып, айдоочулук күбөлүгүн албаган жарандардын күбөлүгү жараксыз деп табылып, кайрадан автомектепке окуп келиши керек болот. Ал эми 2016-жылдын 1-январына чейин окутуудан өткөн жана 2018-жылдын 1-октябрына чейин айдоочулук күбөлүктү алуу боюнча сынак тапшыруу үчүн келбеген адамдар кайра окутуудан өтүүгө тийиш. Жаңы токтом расмий жарыялангандан тартып он беш күн өткөндөн кийин күчүнө кирет", - деп айтылат маалыматта.