Бишкекте бала сатууга шектелип кармалгандардын бири кош бойлуулуктун 8-айындагы аялга аборт жасаган. Окуянын чоо-жайы

Бишкекте бала сатуу фактысына шектелип кармалгандардын бири 8 айлык кош бойлуу аялга аборт жасаган. Бул тууралуу бүгүн, 20-сентябрда SUPER.KG'ге укук коргоо органдарындагы ишенимдүү булактар билдирди.

Маалыматка ылайык, окуя август айынын башында Бишкек шаарында орун алган. Анда кош бойлуулуктун 32 жумалыгында келин Москва көчөсүндө жайгашкан жеке менчик клиникалардын бирине боюнан алдыруу үчүн кайрылган. Кош бойлуу келинге тиешелүү дары-дармектер берилип, клиниканын гинекологу ага аборт жасаган. Кийин келин эсине келип, ызы-чуу салып, "дарыгерлер тирүү төрөлгөн баламды сатып жиберди" деп милицияга билдирген.

Жеке клиникага милиция кызматкерлери келип, териштирүү иштерин жүргүзүшкөн. Кийин клиниканын бир нече кызматкери жана аборт жасаган гинеколог милиция бөлүмүнө жеткирилип суракка алынып, алар окуянын чоо-жайын түшүндүрүп беришкен. "Кош бойлуу келин боюнан алдыртуу үчүн бир нече жерге кайрылып, бирок түйүлдүк чоң болгондугуна байланыштуу дарыгерлер баш тартышкан", - деп билдирген кош бойлуулуктун 8-айындагы аялга аборт жасаган гинеколог.

Учурда бала сатууга шектелип 5 адам камакка алынды. Аларга "адам сатуу", "жасалма документ жасоо", "мыйзамсыз аборт жасоо" беренелери менен кылмыш иштери козголуп, тергөө амалдары жүрүүдө. Кош бойлуулуктун 8-айында аборт жасаган гинеколог да бала сатууга шектелип камакка алынганы маалым.

Мыйзам боюнча, Кыргыз Республикасынын аймагында 22-жумага чейин гана аборт жасоого, анда да медициналык көрсөтмөсү же социалдык себептери болсо мүмкүн.