Жогорку Соттун төрайымы: Атайын сурамжылоого катышкан жарандардын 73 пайызы сотторго ишенерин айткан

Кыргыз өлкөсүндө жүргүзүлгөн сурамжылоого катышкан миңден ашык жарандын 73 пайызы сот системине ишенерин айткан. Бул тууралуу Жогорку Соттун төрайымы Айнаш Токбаева бүгүн, 20-сентябрда болгон маалымат жыйында билдирди.

Анын айтымында, бул Жогорку Соттун жүргүзгөн сурамжылоосу эмес.

"Жарандардын сотторго болгон ишеним деңгээлин аныктоо максатында эл аралык уюумдар менен сурамжылоо жүргүздүк. Албетте, бул пилоттук түрдө гана өттү. Муну мен жалпы өлкө боюнча жүргүзүлгөн сурамжылоо деп айтпайм. Жалпысынан 1044 адам катышты. Алар Бишкектин тургундары. Биз биринчи жолу бул ыкманы сынап көрдүк. Эми аны кеңейтебиз. Буга чейин сотторго жарандардын 80-90 пайызы ишенбейт деп айтылып келген. Бирок бул эмненин негизинде аныкталганы белгисиз", - деди ал.

Кыргыз мамлекетинин сот системи коррупциялашканы жана жарандардын ишеними төмөн экени буга чейин эле айтылып келген. Жадакалса президент Сооронбай Жээнбеков да бул тармакты паракорлукка батып калганын айтып, кескин сындаган.