Кубанычбек Кулматовду жубайы менен жолугуштурбай жатканы боюнча УКМК жооп берди

Бишкектин экс-мэри Кубанычбек Кулматов менен жолугушуу боюнча Ж.Т. аттуу жарандан 4 ирет арыз келип түштү. Бул тууралуу Улуттук мамлекеттик коопсуздук комитетинин басма сөз катчысы Рахат Сулайманов SUPER.KG порталына билдирди.

Маалыматка караганда, тийиштүү документтер жок болгону үчүн Кулматовго жолугушууга уруксат берилген эмес.

"Кулматов менен жолугушуу боюнча Ж.Т. аттуу жарандан бизге 4 жолу арыз келип түштү. Бирок анда анын аялы экенин тастыктаган документ берилген эмес. Бул боюнча арыз ээсине да түшүндүрүлдү", - деди Сулайманов.

Буга чейин Жамиля Турганова УКМК күйөөсү Кубанычбек Кулматов менен жолугушууга уруксат бербей жатканын айтып чыгып, 7 жолу арыз жазганын билдирген. 19-сентябрдагы Жогорку Кеңештин жыйынында аталган маселени депутаттар Асел Кодуранова менен Ирина Карамушкина да көтөрүп чыкты. УКМКнын төрагасы Идрис Кадыркуловдун айтымында, Кулматовго эч кандай чектөө коюлган эмес. Турганова интернетке Кулматовдун мыйзамдуу жубайы экенин тастыктаган күбөлүктүн сүрөтүн да жарыялады.

Кубанычбек Кулматов 2014-жылы Бишкек шаарынын мэри болуп турган кезде Калыс-Ордо конушундагы мектеп жана бала бакчага бөлүнгөн акчаны мыйзамсыз колдонгон деп айыпталууда.

Мындан улам ага 18-май күнү Кылмыш-жаза кодексинин 303-беренеси (коррупция) менен кылмыш иши козголуп, 5-июнда Биринчи Май райондук сотунун чечими менен 28-июнга чейин камакка алынган.