Арменияда жөө жүрүүчүлөрдүн өтүп кетүүсүн күтүп турган кортеждин сүрөтү кызуу талкууга алынды

Интернетте жөө жүрүүчүлөрдүн өтүп кетүүсүн күтүп турган кортеждин сүрөтү кызуу талкууга алынды. Аталган сүрөт 22-сентябрь Армениянын Эгемендүүлүк күнүндө Ереван шаарында маалымат каражаттарынын биринин сүрөтчүсү тарабынан тартып алынган.

Сүрөттөн Еревандагы Франция аянтында бийлик өкүлүнүн кортежи жөө жүрүүчүлөрдүн өтүп кетүүсүн күтүп турганын көрүүгө болот. Такталбаган маалыматтарга таянсак, аталган кортеж Армениянын премьер-министри Никол Пашинянга таандык.

Интернет колдонуучулардын жазганына ылайык, өлкөдө болуп өткөн революциядан кийин бийлик өкүлдөрүнүн карапайым элге болгон мамилеси өзгөргөн. Толкундоолордон аз гана убакыт өткөнүнө карабастан, жаңы бийлик алгылыктуу иштерди жасап, ачык иштеп өлкөнү өнүгүү жолуна койгон.

Эске салсак, Пашинян премьер-министрлик кызматка 2018-жылдын 8-майында келген. Бул убакыт ичинде ал бир топ саясатчыларга кылмыш ишин козготуп, коррупцияга каршы катуу күрөш баштаган.