Депутат "учакта мас абалында чуу чыгарды" деп кызматтан алынган Зууракан Каденова Түштүк Кореяга эмгек өргүүсү учурунда дипломаттык паспорт менен барганын айтты

"Зууракан Каденова премьер-министрдин уруксаты жок эмгек өргүүсүнө чыгыптыр" деди депутат Аида Касымалиева парламенттик комитеттин жыйынында.

Ал Каденова иштеп келген Эмгек жана социалдык өнүгүү министрлигинде жетекчилер тарабынан мындай мыйзам бузуулар көп катталганын кошумчалады.

“Аталган министрликтин башчысы жана анын орун басарлары чет өлкөдөгү семинарларга кызматкерлерин эмес өздөрүн жаздырат экен. Зууракан Каденова эмгек өргүүсү учурунда дипломаттык паспортту колдонуптур. Биз мындай паспортту кызмат учурунда гана колдонобуз. Премьер-министрдин уруксаты жок эмгек өргүүсүнө чыгыптыр", - деди Касымалиева.

22-сентябрда эмгек жана социалдык өнүгүү министринин орун басары Зууракан Каденова Түштүк Кореянын Сеул шаарындагы аэропортто Сеул-Алматы каттамындагы учакка мас абалда чыгып, чуу чыгарганы айтылган. Анын айынан башка жүргүнчүлөр да учактан чыгарылып, учак эки саат кечигип учууга аргасыз болгонун каттам жүргүзгөн "Эйр Астана" компаниясынан SUPER.KG'ге кабарлашкан. Аталган маалыматты Кыргыз өлкөсүнүн Түштүк Кореядагы элчилиги да тастыктаган.

Ушул эле күнү өкмөт башчы Мухаммедкалый Абылгазиев аны ээлеген кызматынан бошотуу буйругуна кол койгон.