ЭЛДИК КАБАР: Окурман: "Бишкектеги Ак-Ордо конушуна жаңы мектеп салынды, бирок унаа жолдо тротуар жок. Балдардын коопсуздугун ким ойлойт?"

Бишкектеги Ак-Ордо жаңы конушунда жаңы мектепке баруучу жолдун четинде тротуар жок, окуучулар унаа жол менен окууга барып келүүгө аргасыз. Бул тууралуу жергиликтүү жашоочу Жылдызбек Турсунбаев "Элдик кабарга" маалымдады.

Анын айтымында, аталган конуштун ортосунда жайгашкан Муктар Өмүракунов жана Тагай Бий көчөлөрүнүн кесилишине жаңы мектеп курулуп, быйыл пайдаланууга берилген.

"Мектеп ачылып конуштун жашоочулары кубанып калышты. Ата-энелер дарек боюнча балдарын ачылган билим уясына тапшырышты. Албетте, үйдүн жакын болгону балдардын маршруттук таксиге тыгылбай жөө барып келгенине ыңгайлуу. Бирок бүгүн жаңы окуу жылынын башталганына 25 күн болду. Күн сайын унаа зуулдап өткөн, тротуары жок жолдун чети менен мектеп окуучуларынын жөө каттап жаткандыгы мени кооптондурат.

"Эрдик кылсаң сүрө кыл" демекчи мамлекет мектеп салгандан кийин ал жактан балдарыбыз каттай турган тротуарды дагы ойлонуштуруп койсо жакшы болмок. Себеби көптөгөн үйлөр же жер план ээлери мыйзамсыз жолду көздөй чыгып кеткен сыяктанат. Жол түшүп жатканда эл басчу тротуар дагы пландалат деп Транспорт министрлигинин айтканы бар. Андай болсо Ак-Ордодогу Тагай Бий көчөсүнүн тротуары кайда? Эмнеге буга көңүл бурулбайт? Бул меселе сөзсүз бирөөнүн баласын унаа сүзүп кеткенден кийин гана капарга алынабы?" - деп суроо салган тургун өзүнүн билдирүүсүндө.