Эмгек жана социалдык өнүктүрүү министрлигинин жетекчилери дипломатиялык паспортторду жеке максаттарына пайдаланышканы аныкталды

Эмгек жана социалдык өнүктүрүү министрлигинин жетекчилери дипломатиялык паспортторду жеке максаттарына пайдаланышканы аныкталды. Бул тууралуу Башкы прокуратуранын маалымат кызматынан 25-сентябрда кабарлашты.

Анда айтылгандай, Башкы прокуратура тарабынан аталган министрликте пландык текшерүү жүрүп, жыйынтыгында бир катар мыйзам бузуу фактылары аныкталган. Башкача айтканда, Кыргыз Республикасынын тышкы миграция боюнча мыйзамы, кызматтык жана дипломатиялык жоболору бузулган.

"Ушул жылдын 12-сентябрында министрликтин Адам ресурстарын башкаруу боюнча бөлүмүнүн жетекчиси тарабынан иштеп жаткан жана жумуштан кеткен кызматкерлерге кызматтык жана дипломатиялык паспортторду берүүдө административдик мыйзам бузуу болгону аныкталган. Козголгон кылмыш иши Биринчи Май райондук сотунун кароосуна жиберилген. Андан сырткары министрликтин жетекчилери дипломатиялык паспортторду жеке максаттарына колдонушканы аныкталган. Азыркы учурда бул багытта текшерүү иши улантылууда. Жыйынтыгында министрликтин кызмат жетекчилерине карата юридикалык баа берилет", - деп айтылат маалыматта.

Депутат Аида Касымалиева 24-сентябрь күнү Жогорку Кеңештин комитет жыйынында эмгек жана социалдык өнүктүрүү министри, анын орун басары чет өлкөгө окууларга көбүнчө өздөрү чыгат деген пикирин айткан. Ошондой эле эл өкүлү алар көпчүлүк учурда дипломатиялык паспортту колдоно турганын билдирген.