Депутат Касымалиева экономика министринин коомдук башталыштагы кеңешчиси Түштүк Кореяда косметологиялык операция жасатып, семинарга катышпай жүргөнүн айтты

Депутат Аида Касымалиева экономика министринин коомдук башталыштагы кеңешчиси Айнура Жакыпованын чет жердеги туура эмес иштерин белгиледи. Ал бул тууралуу социалдык түйүндөгү баракчасына жазып чыкты.

"Мага "КОIСА" агенттигинен байланышып, экономика министринин коомдук башталыштагы кеңешчиси Айнура Жакыпова боюнча нааразычылык билдирди. Ал айым Түштүк Кореяда өткөрүлгөн семинарга 10 күн катышпай, өзүнө косметологиялык операция жасатып жүргөн. Бул сапардын бардык чыгымдарын "КОICА" агенттиги төлөгөн. Мен бул маселени эртең палатада көтөрүп, тийиштүү тапшырманы берем", - деп жазат баракчасына Касымалиева.

Экономика министрлигинин басма сөз кызматы SUPER.KG порталына Айнура Жакыпова аттуу адам аталган мекемеде иштей тургандыгын жана бул маселе боюнча Жакыповадан өздөрү дагы жооп күтүп жатканын билдирди.

Депутат Аида Касымалиева 24-сентябрь күнү Жогорку Кеңештин комитет жыйынында эмгек жана социалдык өнүктүрүү министри, анын орун басары чет өлкөгө окууларга көбүнчө өздөрү чыгат деген пикирин айткан. Ошондой эле эл өкүлү алар көпчүлүк учурда дипломатиялык паспортту колдоно турганын билдирген.