"ЭЛДИК КАБАРга" жооп: Райондук билим берүү бөлүмү: "Ноокаттын Агарт аймагындагы мектептин имараты ижарага алынган. Бул жылы аны жаптык"

"ЭЛДИК КАБАР" рубрикасына окурман Ош облусуна караштуу Ноокат районундагы Агарт башталгыч мектебинин бүгүнкү абалын видеого тартып жөнөткөн. Анда мектептин ичинде электр энергиясы жок, урап калуу коркунучунда турганын айткан.

Бул маселе боюнча Билим берүү жана илим министрлигине кайрылганыбызда, окурман жөнөткөн маалымат калп экенин билдирди.

"Ош облусунун Ноокат районундагы Агарт башталгыч мектеби жөнүндө таратылып жаткан маалымат жалган. Аталган мектеп былтыркы окуу жылында жабылган. Анткени былтыркы жылы мектепте 1-4-класстарда жалпысынан 12ден ашпаган окуучу окуган. Бул аз комплекттелген мектеп. Учурда окуучулар жакынкы айылдагы билим берүү мекемесинде окуп жатышат. Ошондой эле аталган айылда 1-класска бара турган жалгыз гана окуучу бар. Ал эми мектептин жалгыз мугалимин иш менен камсыз кылуу боюнча Ноокат райондук билим берүү бөлүмү алектенип жатат", - дейт басма сөз кызматы.

Ноокат райондук билим берүү бөлүмүнүн башчысы Акуш Асанбаев Агарт башталгыч мектеби 2018-2019-окуу жылында жабылганын айтып, буларга токтолду.

"Аталган мектеп Ноокат районунан бир канча чакырым алыстыктагы тоодо жайгашкан. Ал жакка унаа дагы каттабайт. 2008-жылы балдардын саны көп болгондуктан айыл өкмөтү бир тургундун үйүн ижарага алып, балдарды окутуп баштаган. Башталгыч мектепте 1-2-класстын окуучулары бир окуса, 3-4-классты окуучулары чогуу окушат. Былтыркы жылы, тагыраагы, 2017-2018-окуу жылында 11 бала окуп, алардын 6-7си 4-классты аяктаган. Мындан улам 2018-2019-окуу жылында мектепти жапканбыз. Айыл тургундары балдарын Ноокат районундагы туугандарыныкына жиберип, ошол жактагы мектептерде окутат. Ал эми видеого тартып алып, балдар окуп жатат деген автор аны кандай максатта жасаганын билбейм. Бүгүн, 26-сентябрда аталган айылда кандай маселе болуп жатканын билүү үчүн райондон кызматкерлерди жибердик", - дейт Асанбаев.

Агарт аймагында 30дай үй-бүлө жашайт.