Кара-Сууда жүгөрү талаасына жашынган автоматчан кылмышкер 6 күндөн бери кармала элек

Ош облусунун Кара-Суу районунда милициядан качып, жүгөрү талаасына жашынган автоматчан кылмышкер дале кармала элек. Бул тууралуу Ош облустук ички иштер башкармалыгынан билдиришти.

Маалыматка ылайык, кылмышкердин изделип жатканына 6 күн болду.

"Кылмышкер кармала элек. Издөө иштери жүрүүдө. Учурда башка маалыматтар жок", - деп кыскача комментарий беришти милициядан.

Эске салсак, 20-сентябрда саат 14:00 чамасында милицияга "издөөдө жүргөн Жылдызбек Бекмурзаевди Кара-Суудагы кафелердин биринен көрдүк" деген билдирүү түшкөн. Аталган аймакка милиция кызматкерлери барганда издөөдө жүргөн кылмышкер автоматтан ок чыгарам деп коркутуп изин суутуп кеткен.

Жылдызбек Бекмурзаев өткөн жылы чек араны мыйзамсыз кесип өттү делип Казакстандын аймагынан кармалган. Чек арадан мыйзамсыз өткөндүгү үчүн сот Бекмурзаевди 6 айга эркинен ажыраткан, бирок ал камактан качып кеткен. Казакстандын укук коргоо органдары ага издөө жарыялаган.