Жанар Акаев бийликке: "Элдин кыжырына тийген талапкерлерди кайдан табасыңар?"

"Токон Мамытов акыйкатчы болуп шайланбашы керек" деп Жогорку Кеңештин жыйынында акыйкатчылыкка талапкерлерди кароодо депутат Жанар Акаев билдирди.

Ал КСДП партиясы акыйкатчылыкка көрсөткөн Токон Мамытовдун талапкерлигине каршы экенин билдирип, Мамытов бийликтин тилин уккан талапкер болорун белгиледи.

"Менин жеке пикиримде, Токон Мамытов акыйкатчы болуп шайланса, парламент коомчулуктун катуу сынына кабылат. Бийлик, акыркы учурда элдин кыжырына тийген талапкерлерди чыгарып жатасыңар, таң калам силерге мындай талапкерлерди кайдан табасыңар? Бишкектин мэри, министрлер, соттор, бул кызматтарга алып келген талапкерлериңердин бирөөсүнө да эл ыраазы эмес. Коомчулук кыжырланган сайын силер үстөкө-босток элге жакпаган талапкерди сунуштап жатасыңар. Биз Акыйкатчы институтунда реформа болуш үчүн эрки бар адамдарды алып келишибиз керек, андай адамдар талапкерлердин арасында бар.

Дагы бир маанилүү маселени айтып коёюн, акыйкатчыны шайлоо өзү акыйкат өтүшү керек. Комиссия мүчөлөрү талапкерлер отурган жердин артында турат, ошондон ары өтпөсөңөр, добуштарды көзөмөлдөө деген болбош керек. Эл өкүлдөрү өзүбүз парламентте туруп добушубузду көзөмөлдөтсөк кооомчулукка уят болобуз.

Акыйкатчы тил алчаак адам болбошу керек, азыр бийлик сунуштап жаткан адам ошондой болушу мүмкүн. Токон Мамытов адам катары жакшы киши, бирок акыйкатчы кызматына жарабайт. Акаев, Бакиев, Атамбаевдин учурунан бери эл тараптагы негизги ойду айтпаган адам элдин укугун кантип коргойт? Бизге чындыкты чыркыратып айткан адам керек", - деди Акаев.