Ырчы, ди-джей Чолпон Талипбек маммопластикалык операция жасатты

"Нон-Стоп" дуэтинин мурдагы солисти, ырчы жана ди-джей Чолпон Талипбек сырткы келбетин өзгөртүп, эмчегинин көлөмүн 2-өлчөмгө чоңойтту. Маммопластикалык операция бала эмизүүгө эч кандай таасир этпей турганын айткан ырчы буларга токтолду.

"Мен көкүрөгүмдүн көлөмүн өзгөртүүнү бир жыл мурда ойлонуп баштагам. Маммопластиканын оң жактарын, терс жактарын салыштырып, хирургдардын жасаган иштерине күбө болуп жүрдүм. Мындай кадамга баруума дагы бир айым түрткү болгон. Аны менен бир кечеде жолугуп, ал мага маммопластикалык операция жасатканын айтты. Ошол учурда ал келин кош бойлуу экен. Төрөгөндөн кийин баласын эмизип жатканын айтты. Ошентип моралдык жактан өзүмдү даярдадым. Акыркы учурда бир калыпта жүрүү үчүн диета кармап баштагам. Бирок салмак менен кошо көкүрөгүмдүн өлчөмү дагы кичирейип кетти. Мындан улам көкүрөгүмдүн көлөмү бир калыпта болсун деп ушул кадамга бардым. Маммопластика жасаткым келип жатканын апама айтсам каршы болгон. Бул тууралуу бир канча ирет сүйлөшүүлөр болуп, эне болгонумда деле анын зыяны жок экенин айтып жүрдүм. Кийин ата-энем чечимимди сыйлай турганын, менин тандоом, жашоом экенин айтып, уруксат беришти. Мага эркиндик берген ата-энеме чоң рахмат", - дейт ал.

Ал эми операция учурунда андан кийинки сезимдери тууралуу Чолпон Талипбек мындай дейт.

"Операция жасай турган бөлмөгө киргенде буттарым калтырап, коркуу сезимдери курчап алды. Кушеткага жатканда ыйлагым келип жатты. Хирургдар мага ийне сайгандан кийин денем үшүп, сол колум ооруп баштады. Дароо эле көзүмө жаш алып дарыгерлерден мындай белгилер жөндүү элеби деп сурай баштадым. Бир убакта уктап калыптырмын. Көзүмдү ачсам палатада жатыптырмын. Эч кандай ооруну сезген жокмун. Бирок азырынча керебеттен өз алдымча тура албай жатам".