Баласын тепкени интернетке жарыяланган ата Мамлекеттик каттоо кызматынан 1 миллион 300 миң сом талап кылууда

Жерде жаткан баласын тепкени интернетке жарыяланган Мамлекеттик каттоо кызматынын мурунку кызматкери өзү иштеп кеткен мекемени сотко берди. Бул тууралуу Мамлекеттик каттоо кызматынын маалымат кызматы билдирди.

Маалыматка ылайык, Бариер Адиев жумуштан мыйзамсыз айдалганын айтып, мурдагы кызматына кайра кайтарып алууну, жумуштан айдалган күндөн берки айлык маянасын жана башка чыгымдарын төлөп берүүнү талап кылып сотко кайрылган. Жалпы талап кылган каражаттын суммасы 1 миллион 356 миң сомду түзөт.

Белгилей кетсек, өткөн жылдын 2-декабрында Бишкек шаарында эркек киши кичинекей баланы тээп жаткан видео социалдык тармакта жарыяланган. Ошол эле күнү кичинекей баланы тепкен адамдын кармалганын Бишкек ШИИББинен билдиришкен. Тергөө иштеринин жүрүшүндө ал баланын атасы экендиги аныкталган. Андан соң Бишкек шаарынын Октябрь райондук соту баланы тепкилеген атаны убактылуу кармоочу жайга 2 айга камакка алып, жубайы сотко "эч кандай доом жок" деп тосмо арыз жазып бергендиктен, Бариер Адиевге козголгон кылмыш иши токтотулган.