Токтогул ГЭСиндеги жетекчилердин бири жумушчуларды өз эгин талаасына барып иштетти делген видео тарады

"Токтогул ГЭСиндеги Коммуналдык ишканалар комбинатынын жетекчиси Өмүржан Кыдырмаев өзүнүн эгин талаасына жумушчуларды алып барып, жумуш учурунда иштетти" делген видео интернетте кызуу талкууланууда. Аталган видеону журналист Кудрет Тайчабаров өзүнүн интернеттеги баракчасына жүктөгөн.

Тайчабаровдун билдиришинче, окуя кечээ, 27-сентябрда Кара-Көл шаарында болгон. Ошондой эле ал ишкананын жетекчисин кызматтан алынышын талап кылган.

“27-сентябрда Кара-Көл шаарынын Токтогул ГЭСиндеги Коммуналдык ишканалар комбинатынын жетекчиси Өмүржан Кыдырмаев өзүнүн эгин талаасына жумушчуларды алып барып, жумуш учурунда иштетиптир. Президенттин жарлыгына ылайык, "2018-жыл - Аймактарды өнүктүрүү жылы" деп жарыяланган. Көрсө, аймактагы жетекчилер өзүнүн чарбасын жумушчулардын күчү менен өнүктүрүш керек деп түшүнүп алган окшойт. "Электр станциялары" ААКсынын жетекчилиги, кандай кадрды жетекчилик кызматка койгонсуңар? Садагаң болоюн Советтен (Кара-Кулжа районунан - ред.) эмес, коркпой кызматтан алгыла. Себеби түнкү нөөмөттөн эс алууга чыккан жумушчу кайра эс албай жумушка чыккан болсо, уктап калып чоң кырсык болушу мүмкүн. Арасында кароолчулар, сантехниктер, жооптуу кызматкерлер жүрөт. Андан да атасындай болгон аксакалдарды, энесиндей болгон апаларды иштетип койгонун кандай түшүнсө болот? "Электр станциялары" АККсы, чара колдоносуңарбы же жергиликтүү жетекчилер бай-манап заманындагыдай жашай беришеби? Кызматтан алынсын! Көзөмөлгө алабыз", - деп жазган Тайчабаров.

SUPER.KG порталы аталган маалыматтын чын-төгүнүн тактоо үчүн "Электр станциялар" ААКсына байланышканда, аталган мекеменин басма сөз катчысы Тагжана Айдаралиева видеодогу жүгөрү оруп жүргөн адамдар чын эле Токтогул ГЭСиндеги Коммуналдык ишканалар комбинатынын кызматкерлери экендигин ырастап, бирок ал жер менчик эмес, ГЭСтин карамагындагы жер экенин айтты.

"Бул видео кандай максатта жарыяланып жатканын билбейм. Ал жер ишкананын жетекчисинин менчиги эмес. Токтогул ГЭСинин карамагында 10 гектар жер бар. Кадимки мамлекеттик жумуштагы ишембилик катары өткөрүлгөн иш", - деди Айдаралиева.