Кара-Суудагы жаңы мектептин ачылышына вице-премьер Алтынай Өмүрбекова кечигип келгени айтылууда

Ош облусуна караштуу Кара-Суу районунда жаңы мектептин ачылыш аземине вице-премьер-министр Алтынай Өмүрбекованы 2 сааттан ашык күткөн окуучулар өздөрүн жаман сезип, көлөкөдө баш калкалаган. Бул тууралуу жергиликтүү маалымат булактары жазып чыкты.

Маалыматка ылайык, Катта-Талдык айыл өкмөтүндөгү Кызыл-Ордо айылында 320 окуучуга ылайыкталган жаңы мектептин ачылышы орун алган. Анын ачылышын 2 сааттан ашык кечигип келген Өмүрбековадан башка Улуттук статистикалык комитетинин башчысы Акылбек Султанов жана Ош облусундагы өкмөттүн ыйгарым укуктуу өкүлү Узарбек Жылкыбаев катышкан.

Окуучулар бийлик өкүлдөрүнө өздөрү даярдаган чакан концерттик программасын көргөзүү үчүн күтүшкөн. Күндүн ысыгында 2 сааттан ашык туруп турган окуучулар өздөрүн жаман сезген. Мугалимдер өздөрүн жаман сезген окуучуларды көлөкөгө алып барышкан.