УКМК: "Ош шаардык мэриясынын кызматкерлери ден соолугунун мүмкүнчүлүгү чектелген адамдарга берилүүчү батирлерди мыйзамсыз бөлүштүргөн"

Ош шаардык мэриясынын кызматкерлери жана турак жай комиссиясынын мүчөлөрү ден соолугунун мүмкүнчүлүгү чектелген адамдарга батир берүүдө мыйзам бузуу фактысы катталган. Бул тууралуу УКМКнын басма сөз кызматы билдирди.

Маалыматка ылайык, бул факты буга чейин козголгон кылмыш иши тергелип жаткан учурда аныкталган. Анда 2017-жылы Ош мэринин токтому менен “Анар” кичи районунда көп кабаттуу үйдө 66 батир ден соолугунун мүмкүнчүлүгү чектелген адамдарга бөлүнүп берилген.

"Текшерүүнүн жүрүшүндө 8 адамга берилген кыймылсыз мүлкү жок экендигин тастыктоочу маалым каты жасалма болгон. Ошондой эле 32 жаран батир алганга чейин Бишкек шаарында, Ош, Жалал-Абад облустарында жайгашкан менчик турак жайларында жашап келишкен. Муну менен катар 9 адам 3-топтогу майыптыгы менен батирди мыйзамсыз алышкан. Турак жай кодексине ылайык 1 жана 2-топтогу майыптар гана кезексиз батир алуу укугуна ээ.

Учурда бул факт боюнча Ош шаардык прокуратурасы тарабынан Кылмыш-жаза кодексинин 304-беренесинин 2-бөлүгү (кызматтык абалынан кыянаттык менен пайдалануу), 305-беренесинин 2-бөлүгү (кызматтык ыйгарым укуктардан аша чабуу) жана 315-берененин 2-бөлүгү (кызматтык жасалмалуулук) боюнча кылмыш иши козголуп тергөө иштери башталды", - деп жазылат маалыматта.