Тажикстанда жол кырсыгынан 7 этникалык кыргыз каза болду

Тажикстандын Лахш районунда (мурдагы Жерге-Тал районунда) жол кырсыгынан 7 адам каза болгонун жергиликтүү Өзгөчө кырдаалдар боюнча комитети маалымат таратты. Кийинчерээк жергиликтүү Озоди Тажик кызматы каза болгон 7 адам этникалык кыргыздар экенин жазып чыкты. Булардан тышкары дагы беш жаран жаракат алган.

Маалым болгондой, жол кырсыгы 30-сентябрь күнү саат 19:30 чамасында орун алган.

Жүк ташуучу ЗИЛ үлгүсүндөгү унаада 12 адам болгон. Алар тоодон картошка казып, кайтып келе жатышкан. Айдоочусу Сунатулло Юсупов аттуу адам жүк ташуучу унааны башкара албай, унаа 100-120 метрлик тик жардан ылдый кулап кеткен.

Озоди Тажик кызматы бул жол кырсыгы тууралуу төмөнкүлөрдү жазып чыкты: "Кырсыктан бир үй-бүлө мүчөлөрү каза болгон, алардын жаш курагы болжол менен 4 жаштан 45 жашка чейинкилер. Ал эми Тажикстандын Ички иштер министрлиги жол кырсыгынан дагы 5 жаран жаракат алганын, алардын ичинен экөөсү оор абалда жандандыруу бөлүмүнө жаткырылганын билдирген. Ошондой эле айдоочу да учурда ооруканада жатат".

Маалымат үчүн: Тажикстанда жашаган этникалык кыргыздардын көпчүлүгү Жерге-Тал жана Мургаб райондорунда жашашат. Айрым маалыматтарга караганда, Тажикстанда жашаган этникалык кыргыздардын саны 61 миңге жакын.