Москва-Ош аба каттамы аркылуу кечээ уча турган учак бүгүн түштө Ошко келип конду

Москва-Ош каттамы менен кечээ, 30-сентябрда кечинде келе турган учак бүгүн түштө Ош шаарына келип конду. Бул тууралуу бүгүн, 1-октябрда SUPER.KG порталына "Ош" эл аралык аэропортунан билдиришти.

Москвадан 100 жүргүнчүсү менен Ошко кечээ түнү уча турган учактын рейси 2 ирет жылдырылып, 13 сааттык кармалуудан кийин Ош калаасына келип конду.

"Москва-Ош аба каттамы саат 14:00 чамасында "Ош" эл аралык аэропортуна келип конду" деп билдиришти аба майданынан.

Мындан сырткары Ош-Москва багыты боюнча бүгүн уча турган эки рейс токтотулганы айтылып жатат. Бул окуя боюнча аба каттамын аткарып жаткан AviaTraffic компаниясы комментарий берүүдөн баш тартышууда.

Эске салсак, кечээ, 30-сентябрда саат 8:30да Ош-Москва аба каттамы менен уча турган Boeing 737 үлгүсүндөгү учактын алдыңкы шассисиндеги дөңгөлөк жарылып, учак токтотулган. Жүргүнчүлөрдү Москвага жеткирүү үчүн Бишкектен учак жөнөтүлүп, 9 сааттык кармоодон кийин абага көтөрүлгөн. Окуяны жеринен иликтөө үчүн комиссия түзүлгөн.