Москвада кыргыздар барып эс алган кафе-ресторандарда мигранттарга түшүндүрүү иштери жүргүзүлдү

Буга чейин, ушул жылдын 9-сентябрында Москва шаарындагы Аксакалдар кеңеши жана Коомдук кеңештин демилгеси менен Кыргыздын Орусиядагы элчилиги, Миграция кызматы, ИИМдин өкүлчүлүктөрүнүн кызматкерлеринин катышуусунда мигранттар менен чогулуш өткөрүлгөн. Анда бир катар маселелер талкууланып, анын ичинде кыргыздар барып эс алып жүргөн кафе-ресторандар тууралуу да сөз болгон.

Элчиликтин маалыматына ылайык, жыйындын жыйынтыгы боюнча элчиликтин, Миграция кызматынын, ИИМдин өкүлчүлүктөрүнүн кызматкерлеринин, Москва шаарындагы кыргыз диаспорасынын Коомдук кеңешинин төрагасынын, кыргыз диаспоралык уюмдарынын өкүлдөрүнүн курамынан түзүлгөн комиссия уюштурулган.

"Ушул жылдын 20-30-сентябрында жогоруда аталган комиссия өз ишинин алкагында кыргыздарга тиешелүү болгон кафе-ресторандарды кыдырды. Анын максаты - жаштар, унаа айдоочулар (таксисттер), спортчулар, кыз-келиндер, студенттердин жана башка мекендештердин арасында жаралган көйгөйлүү маселелерди талкуулоо жана аны түшүндүрүү жолу менен чечүү.

Комиссия мүчөлөрү "Восточная Ночь" ресторанына, "Олимп" кафесине, "Вишня" ресто-клубуна, "Браво" ресто-клубуна, “Кел-Кел” ресторанына жана “Ангел” ресторан-клубуна барып, ал мекемелерди иштеткен Кыргыз жарандары, эс алып жүргөн мекендештер, жалпы коноктор менен жолугушуп, Орусиянын тийиштүү мыйзамдарын так сактоого чакырды.

Коомдук жайларда, алардын ичинде кыргыздарга тиешелүү болгон ресторан, кафелерде маданияттуу жүрүп, бөтөн жерде кыргыз калкы тууралуу терс пикирди жаратуучу ар кандай аракеттерден алыс болууга, спирт ичимдиктерин колдонбоо тууралуу кеңири түшүндүрүү иштери жүргүзүлдү. Ошондой эле жолугушуу учурунда Кыргыз жарандарын кызыктырган суроолорго да жооп берилди”, - деп жазылат маалыматта.