Бишкекте жөө жүргүнчүлөрдүн жол кырсыктарына кабылуусун алдын алуу жана эскертүү максатында рейд жүрүүдө

Бүгүн, 4-октябрда Бишкек шаарында жөө жүргүнчүлөрдүн жол кырсыктарына кабылуусун алдын алуу жана эскертүү максатында "Жүргүнчү" аталышындагы рейд жүрүүдө.

Рейддин алкагында борбордогу мектептердин айланасында, эл көп топтолгон жайларда, аялдамаларда жолду кесип өтүү эрежелерин сактабаган жөө жүргүнчүлөргө түшүндүрүү иштери жүргүзүлдү. Жол кыймылынын коопсуздугун камсыздоо башкы башкармалыгынын кызматкерлери тарабынан унаа жолду бойлоп, өтмөктөн эмес, жолду кесип өткөн окуучу, улуу муундун өкүлдөрү токтотулуп, түшүндүрүү иштери жүргүзүлдү, айрымдарына эскертүү берилди.

"Мындай иш-чаралар маал-маалы менен өткөрүлүп турат. Акыркы кезде жөө жүргүнчүлөрдүн катышуусундагы жол кырсыктары көп катталгандыгына байланыштуу, Жол кыймылынын коопсуздугун камсыздоо башкы башкармалыгынын кызматкерлери тарабынан мектеп окуучуларына түшүндүрүү иштерин жүргүзүп келет. Аларды жолдон өтүүдө тиешелүү эрежелерди сактоого чакырышат. Административдик жоопкерчилик кодексинин 235 жана 247-беренелеринин 1-бөлүмүнө ылайык, өтмөктөн өтүү эрежесин бузган айдоочуларга 1000 сом, ал эми жөө жүргүнчүлөргө болсо 500 сом өлчөмүндө айып пул төлөөгө милдеттендирилет", - деп билдирди аталган мекеменин басма сөз кызматынын ага-тескөөчүсү Жылдыз Тулеева.