Ингушетиядагы Чеченстан менен болгон чек ара маселесине байланышкан митингде ок атылды

Ингушетиядагы Чеченстан менен болгон чек ара маселесине байланышкан митингде ок атылды. Митингчилер менен жолугушуу үчүн Ингушетия Республикасынын башчысы Юнус-Бек Евкуров чыкканда күч органдары тарабынан асманга ок атылды. Ок атылышына митингчилер тарабынан өлкө башчысын көздөй бош бөтөлкө ыргытылышы себеп болгон.

Магас шаарындагы митингчилер Чеченстан менен болгон чек арага байланыштуу макулдашууга каршы болушууда. Күч органдары депутаттарды имараттын ичинен эвакуациялашты. Ошондой эле ок атуулар угулду. Бул маалыматты Би-Би-Си Орус кызматы жазды.

Жергиликтүү убакыт боюнча эртең мененки саат 10:40та митингчилердин саны 5 миңдей болчу. Учурда алардын саны 10 миңге жетип, үстүнө келип кошулгандардын саны дагы көбөйүүдө. Митингчилер Ингушетиянын белгилүү бир бөлүгүн Чечен бийлигинин көзөмөлүнө өткөрүүгө каршы.

Бүгүн, 4-октябрда жергиликтүү парламент Чеченстан менен жер алмашуу маселесин колдогон. 25 депутаттын ичинен 17си "макул", 3 депутат "каршы", 5 депутат эч бирине добуш берген эмес. Ингушетиянын Конституциялык соту мындай чечимди кабыл алуудан мурда референдум өткөрүлүшү керек болчу деген пикирде бийликтин бул чечимине каршы билдирүү жасады.

Митингчилерди атчан полиция аскерлери коштоп жүрүүдө. Элдин колунда Ингушетиянын желеги бар, арасынан айрымдары "Аллах Акбар" деген ураанды кыйкырышууда. 3-октябрь күнү кечинде Ингушетияда интернет өчүрүлдү.

Ингушетия менен Чеченстандын ортосунда чек ара маселеси СССР кулагандан бери чечилбей келген. 1993-жылы эки республиканын ошол кездеги башчылары Руслан Аушев жана Жохар Дудаев тарабынан чек араны белгилөө, бөлүү боюнча документке кол коюшкан. 26-сентябрда Ингушетиянын борбор калаасы Магаста Чеченстандын башчысы Рамзан Кадыров менен Юнус-Бек Евкуров административдик чек араны бекемдөө боюнча документке кол коюшкан. Бүгүн, 4-октябрда эки республиканын парламенти макулдашууну ратификациялаган.