Каржы полициясы Өзгөндөгү археологиялык мавзолейлерди жабуу курулушуна бөлүнгөн каражаттан 1 миллион сом мыйзамсыз пайдаланылганын аныктады

Өзгөн шаарындагы археологиялык мавзолейлерди жабуу курулушуна бөлүнгөн бюджеттик каражаттарды ыйгарып алуу жана кызматтык жасалмалуулук фактысы аныкталды. Бул тууралуу Экономикалык кылмыштуулукка каршы күрөшүү боюнча мамлекеттик кызматынын маалымат кызматы кабарлады.

Маалыматка ылайык, Ош облусунун Капиталдык курулуш башкармалыгы менен “М.А.” ЖЧКсынын ортосунда Өзгөн шаарынын археологиялык мавзолейин жабуу курулушуна 4 миллион 597 миң 625 сом суммага келишим түзүлгөндүгү аныкталган.

"Курулуш адистери контролдук ченөө жүргүзүшкөндө аткарылган иштердин актысындагы иштердин баасы жана көлөмдөрү 1 миллион сомдон көп суммага көбөйтүлгөн фактысы аныкталды. Ош облусунун Капиталдык курулуш башкармалыгынын жана “М.А.” ЖЧКсынын мыйзамсыз иш-аракеттеринин натыйжасында мамлекеттик бюджетке 1 миллион 131 миң 49 сом суммада, өзгөчө ири өлчөмдөгү зыян келтирилген.

Чогултулган материалдар боюнча Кылмыш-жаза кодексинин 171-беренеси (ишенип берилген мүлктү ыйгарып алуу же жок кылуу), 221-берене (коммерциялык уюмдун кызматчысы кызматтык абалын кыянат пайдалануу), 304-берене (кызматтык абалынан кыянаттык менен пайдалануу) жана 315-берене (кызматтык жасалмалуулук) менен кылмыш иши козголду", - деп жазылат маалыматта.