Тоо кийигин жана анын улагын аткан 4 жаран изделүүдө

Айлана чөйрөнү коргоо жана токой чарба мамлекеттик департаменти Кызыл китепке кирген жаныбарларды аткан жарандарды издөөдө. Бул тууралуу маалыматты аталган департаменттин маалымат кызматы тастыктады.

"Департаменттин Ош облусундагы бөлүмү тоо кийигин жана анын улагын мыйзамсыз аткан белгисиз жарандарды издөөдө. Алар коргоого алынган жаныбарларды атып, сүрөттөрүн социалдык тармактарга жарыялаган. Кийиктин ургаачысын жана балдарын атууга атайын лицензиясы барларга да тыюу салынган. Изделген жарандар кармалса, аларга 100 миң сомдон 200 миң сомго чейинки айып пул салынат", - деп айтылат маалыматта.

Мыйзамга ылайык, тоо кийигинин эркегин атуу үчүн атайын лицензия алуу керек. Лицензия 70 миң сом турат. Мыйзамсыз атылган кийик үчүн салынуучу айып пулдун көлөмү 100 миң сом, марал, аркар жана аюу үчүн 1 миллион сом, ак барс үчүн 1 миллион 500 миң сомду түзөт.