Кара-Сууда мындан 15 күн мурун милициядан качып "жүгөрү талаасына жашынган" делген автоматчан кылмышкер Караколдон кармалды

Кара-Сууда мындан 15 күн мурун милициядан качып "жүгөрү талаасына жашынган" делген автоматчан кылмышкер Ысык-Көлдөн колго түшүрүлдү. Бул тууралуу бүгүн, 5-октябрда Ички иштер министрлигинен билдиришти.

"Жүргүзүлгөн иликтөө иштеринин алкагында бир нече кылмыштарга катыштыгы бар, издөөдө жүргөн кылмышкер кечээ, 4-октябрда Ысык-Көл облусунун Каракол шаарынан колго түшүрүлгөн. Кылмышкердин жанынан кутучаларга салынган 20 даана гашиш болгон. Учурда бул факт боюнча тергөө амалдары жүрүүдө", - деп айтылат маалыматта.

Эске салсак, 20-сентябрда саат 14:00 чамасында милицияга "издөөдө жүргөн Жылдызбек Бекмурзаевди Кара-Суудагы кафелердин биринен көрдүк" деген билдирүү түшкөн. Аталган аймакка милиция кызматкерлери барганда издөөдө жүргөн кылмышкер автоматтан ок чыгарам деп коркутуп изин суутуп кеткен.