Дайынсыз болууда делген Интерполдун президенти Кытайда камакка алынганы айтылууда

Интерполдун президенти Мэн Хунвэй Кытайда камакка алынган болушу мүмкүн. Бул тууралуу чет элдик басылмалар Франциянын "Le Mond" гезитине шилтеме берүү менен жазып чыгышты.

Маалыматка караганда, Интерполдун башчысы Кытайда жоголгон эмес. Ал камакка алынып, Пекиндин абагында сакталууда.

"Мэн Хунвэй Франциядан Кытайга 29-сентябрда кеткен. Ошондон бери анын кайсы жерде экени тууралуу маалымат жок. Жубайы анын дайынсыз болуп жаткандыгы тууралуу кабарды тастыктагандан кийин гана издөө иштери башталган. Кийин анын камакка алынганы тууралуу айтыла баштады. Мэн Хунвэйдин кармалышы Кытайдын таасирдүү адамдары менен болгон тирешүүгө байланыштуу болушу мүмкүн", - деп жазышат басылмалар.

Интерпол - күч түзүмдөрүнүн аракеттерин бириктирип, эл аралык издөө жүргүзгөн орган. Анын курамына 190 мамлекет кирет. Башкы кеңсеси Франциянын Лион шаарында жайгашкан.

64 жаштагы Мэн Хунвэй Интерполдун президенти болуп 2016-жылы шайланган. Ал Кытайдын коомдук коопсуздук министринин орун басары катары да иштеп келген.