UFC'нин президенти: "Хабиб Нурмагомедов чемпиондук наамынан ажыратылышы мүмкүн"

"Хабиб Нурмагомедов беттештен кийинки башаламандык үчүн чемпиондук курунан ажыратылышы мүмкүн". Бул тууралуу UFC'нин президенти Дэйна Уайт маалымат жыйын учурунда билдирди.

Анын айтымында, орусиялык мушкер дисквалификацияланат же айыпка жыгылат.

"Хабиб эгерде беттештерден четтетилсе, анда биз аны чемпиондук наамынан ажыратабыз. Адамдардын үстүнө секирип түшкөн мушкер бул жерде башка мушташпашы керек. Хабибге 2 миллион доллар гонорар берилмек. Эми ал териштирүү иштеринен кийин гана тапшырылышы мүмкүн. Мен кайрадан массалык мушташ чыкпашы үчүн Хабибге чемпиондук курду октагондо тапшырган жокмун. Ал мага "мени камагыла, бирок курду тапшыргыла" деди. Биз бул кадамга бара албайт элек", - деди Уайт.

Бүгүн, 7-октябрдагы беттеште Хабиб Нурмагомедов Конор Макгрегордун үстүнөн жеңишке жетип, чемпиондук курун сактап калды. Бирок мушташ аяктаган соң орусиялык мушкер Макгрегордун санаалашы Диллон Дэниске атырылып, октагондон ашып өтүп, уруша кетишти.