Хабиб Нурмагомедовдун атасы: "Балам чектен ашты, мен аны UFC`ден да катуу жазалайм"

Орусиялык мушкер Хабиб Нурмагомедовдун атасы, машыктыруучусу Абдулманап Нурмагомедов аны UFC`ден да катуу жазалай тургандыгын билдирди. Бул тууралуу орусиялык басылмалар жазып чыкты.

Мушкердин атасы тартип баарынан жогору туруш керек деген пикирин билдирген.

"Мушкер октагондун ичинде каалаганын кылат. Бирок алты бурчтуктун сыртында аялдар, балдар бар. Мен баламдын жана анын командасынын кылган иш-аракетин чектен чыккандык деп эсептейм. Хабибди бул кылыгы үчүн UFC`ден да катуу жазалайм", - деп билдирген ал.

Кечээ, 7-октябрда АКШнын Лас-Вегас шаарында өткөн беттеште Хабиб Нурмагомедов атаандашы, ирландиялык мушкер Конор Макгрегор менен бет келип, 4 раундга созулган беттеште жеңишке жетишкен. Бирок беттештен соң Нурмагомедов анын дини, мекени, атасы тууралуу жаман сөздөрдү айткан Макгрегордун санаалашы Диллон Дэнисти октагондон ашып түшүп сабаган. Ал эми анын командасындагы адамдар Макгрегорго чабуул жасашкан.

Бул үчүн ал чемпиондук курдан жана ага беттеш үчүн берилчү акчадан ажырап калышы мүмкүн экендигин UFC`нин президенти Дэйна Уайт билдирген.