Салык кодексине толуктоолор киргизилди

Президент Алмазбек Атамбаев “Салык кодексине толуктоолорду киргизүү жөнүндө” мыйзамга 5-июлда кол койду. Президенттик аппараттын маалыматтык саясат бөлүмү билдиргендей, мыйзамды Жогорку Кеңеш 30-майда кабыл алган. Ал ишмердиктин бул түрлөрүн милдеттүү патенттин негизинде салык алуунун атайын режимине которуу жолу менен чач тарач (сулуулук салону) кызматын көрсөтүүчү, менчик стоматологиялык кызмат көрсөтүүчү жана жарнак такталарын ижарага берүү ишкерлик субъекттерин салыктык администрациялоону жөнөкөйлөштүрүү жана алардын  бюджетке салык төлөмдөрүн көбөйтүү максаттарын көздөйт.

Салык кодексине төмөнкү толуктоолор киргизилет:

а) 348-беренеге ылайык,  чачтарач жана сулуулук салондорунун кызмат көрсөтүүсү, менчик стоматологиянын кызмат көрсөтүүсү, жарнак такталарын ижарага берүү кызмат көрсөтүүсү милдеттүү патенттин негизинде салык алынуучу ишмердик түрлөрүнүн тизмесине киргизилет;  

б) 349-беренеге ылайык, кызмат көрсөтүү менен байланышкан ишкердик ишмердикке патенттик негизде төлөнүүчү салыктын төмөнкүдөй чендери белгиленет: чачтарач жана сулуулук салондору (1 отургузуучу орун үчүн 2000 сом суммасында); менчик стоматология (1 отургузуучу орун үчүн 5000 сом); жарнак такталарын ижарага берүү боюнча (1 жарнак тактасы үчүн 5000 сом).