"Алай" футболдук клубу Фергана өрөөнүнүн Кубогунун алкагындагы тажикстандык команданы утуп алды

Оштун "Алай" футболдук клубу Фергана өрөөнүнүн Кубогунун алкагындагы алгачкы беттешинде тажикстандык команданы утуп алды. Бул тууралуу Кыргыз Республикасынын футбол федерациясынын маалымат катчысы Наталья Угрюмова маалымдады.

Баткен шаарында өтүп жаткан мелдеште 12 жашка чейинки өспүрүмдөр жана клубдар арасында беттештер өтүүдө. Клубдар арасындагы мелдештин 1-турунда Оштун "Алай" командасы Тажикстандын Хужанд командасы менен кез келди.

1-таймдын жүрүшүндө командалар 2 голдон киргизип, 2:2 эсеби менен тыныгууга кетишти. 84-мүнөттө Акрам Умаров айырмаланганга жетишип, эсеп санын 3:2 кылды. Муну менен "Алай" клубу алгачкы беттешинде жеңишке жетти. Кийинки турда "Алай" Өзбекстандын "Нефтчи" футболдук клубу менен кездешет.

9-октябрда орун алып жаткан беттештер:

• Тажикстан (U-12) - Академия (U-12) - 4:0;
• Баткен (U-12) - Өзбекстан (U-12) - 0:1;
• Хужанд (Тажикстан) - Алай (Ош) - 2:3.