Өспүрүмдөр арасындагы Олимпиада оюндары: Хасан Баудунов күмүш медалдын ээси болду

Кыргыз спортчусу Хасан Баудунов өспүрүмдөр арасындагы Олимпиада оюндарында фехтование боюнча мелдеште күмүш медаль тагынды.

Фехтование боюнча континент командалары арасындагы мелдеште Кыргыз өлкөсүнөн Хасан Баудунов катышты. Ал Азия-Океания-1 командасына Тайбэй, Япония, Корея жана Гонконгдун спортчулары менен бирге кирди. Алгачкы беттеште Хасан Баудуновдун командасы Азия-Океания-2 командасын 30:23 эсеби менен утуп алып, анда Баудунов япониялык атаандашын жеңди.

Жарым финалда кыргыз спортчунун командасы Америка командасы менен кез келип, 18:15 эсеби менен утуп алышты. Бул таймашта Хасан Баудунов АКШлык спортчу менен кездешип, 3:2 эсеби менен утту.

Финалдык беттеште Азия-Океания-1 командасы Европа-1 командасы менен кез келип, тилекке каршы, Хасан Баудуновдун командасы 28:25 эсебинде жеңилип калды. Баудунов финалда италиялык Вероли Давиде менен кездешти. Беттеш 20:17 эсебинде италиялык спортчунун жеңиши менен аяктады.

Муну менен Европа-1 командасы алтын медалдарды алса, Хасан Баудуновдун Азия-Океания-1 командасы күмүш медалдарга ээ болду.

Айта кетсек, буга чейин Хасан Баудунов коло медалды утуп алган.