Мирлан Жээнчороев: “Казак чек арачылары Кыргыз жарандарына экинчи сорттогу адамдардай мамиле кылышууда”

"Орусияга унаалар менен бараткан жарандарыбыз кыргыз-казак чек ара бекеттеринде кыйынчылыкка кабылууда”, - деп бүгүн, 10-октябрда Жогорку Кеңештин жалпы жыйынында депутат Мирлан Жээнчороев айтып чыкты.

Эл өкүлү тышкы иштер министрине кайрылып, чек арадагы айрым маселелерди чечүү боюнча коңшу өлкө менен сүйлөшүү керектигин айтты.

“Биздин жарандар Орусияга унаа менен баруу үчүн коңшу Казакстан аркылуу өтөт. Бирок биздин жарандар коңшу өлкөнүн чек ара бекеттеринен өтө албай кыйынчылыктарга кабылууда. Ал жердеги чек арачылар биздин жарандарды экинчи сорттогу адамдардай карап, унааларынын бардык тетиктерине, кийим-кечесине чейин чачып текшерип жатышыптыр. Башкача айтканда, акча алмайын өткөрбөйт экен. Ушул боюнча сүйлөшүүлөрдү жүргүзүп жарандардын көйгөйүн оң жакка чечип бербейсиңерби?!" - деди Жээнчороев.

Тышкы иштер министри Эрлан Абдылдаев эл өкүлү айткан маселе көзөмөлгө алынарын убада кылды.