Абактан бошотулган Чыңгыз Анарбек уулунун жакындары аны Кыргыз жерине өткөрүп берүүнү суранышат

Москвада жөө жүрүүчүлөрдү сүзүп кеткен Чыңгыз Анарбек уулу абактан бошотулду. Агасы Алмаз Анарбеков эми Чыңгызды Кыргыз жерине өткөрүп берүүнү сурана турганын 12-октябрда SUPER.KG'ге кабарлады.

"Иним азырынча абакта. 21-октябрда үй камагына чыгарылат экен. Соттун чечимине ылайык, Чыңгыз эми 1 жыл 6 ай Мосвка шаарынын аймагынан эч кайда чыкпай, кара жумушта иштеп, алган айлыгынын 15 пайызын өкмөткө төлөп бермекчи. Кандай жумушта иштейт, канча акча төгүп берүүгө милдеттендирилгени белгисиз. Жумушту өкмөт өзү таап берет окшойт. Бирок биз тийиштүү министрликтерге кайрылып, аны акырындык менен Кыргыз жерине өткөрүп берүүнү суранабыз", - деди Анарбеков.

Ал эми кырсыктан жабыркагандарга акчалай жардам көрсөтүлгөнүн кошумчалады.

Чыңгыз Анарбек уулу 16-июнь күнү Москванын борбордук көчөлөрүнүн биринде мексикалык футбол күйөрмандарын сүзүп кеткен. Кырсыктан 8 киши жарадар болгон. Айдоочу полиция кызматкерлерине сурак берип жатканда күнү-түнү иштеп уктабагандыктан жолдо уктап кеткенин айткан.

Факты боюнча кылмыш иши козголуп, Анарбек уулу тергөө абагына камакка алынган болчу.