Өспүрүмдөр арасындагы Олимпиада оюндары: Балбан Элмирбек Садыров күмүш медалга татыды

Кыргыз балбаны Элмирбек Садыров өспүрүмдөр арасындагы Олимпиада оюндарында грек-рим күрөшү боюнча мелдеште күмүш медаль тагынды.

Элмирбек Садыров грек-рим күрөшү боюнча мелдеште 60 килограммга чейинки салмак ченинде күч сынашты. Ал алгачкы беттеште Жаңы Зеландиянын балбанын 9:0 эсебинде жеңип, 2-беттешинде мексикалык Мигель Анхель менен кездешип, аны 9:6 эсебинде утуп алды. Муну менен Садыров финалга чыгып, алтын байге үчүн грузиялык Георги Чхиквадзе менен күч сынашты. Беттештин жүрүшүндө грузиялык балбан 9 упай алып, 9:0 эсеби менен жеңүүчү болду. Алтын медалдын ээси Чхиквадзе болсо, күмүш медалды Элмирбек Садыров тагынды.

Муну менен кыргыз спортчуларында 5 медаль топтолду. Күмүш медалдардын ээси суучул Денис Петрашов, балбан Элмирбек Садыров, фехтование боюнча мелдеште Хасан Баудунов (командалык мелдеште) болсо, коло медалдарга Хасан Баудунов жана дзюдочу Султан Жеңишбеков (командалык мелдеште).