Депутат Акматов каржы министрине 3 жылдан бери Кыргыз мамлекети чет өлкөлөрдөн канча насыя алганын тактап коюуну сунуштады

Бүгүн, 15-октябрда Жогорку Кеңештин тийиштүү комитетинин жыйынында депутат Алмасбек Акматов каржы министри Адылбек Касымалиевден 3 жылдан бери Кыргыз мамлекети башка өлкөдөн канча насыя алганын сурады.

Касымалиев так маалыматы жок экенин билдирди.

Депутат бул боюнча суроону министрден Жогорку Кеңештин жалпы жыйынында бере турганын эскертти. “Сиз мамлекет казынасын кармаган адамсыз. Насыя, гранттарга өтө жооптуу караңыз. Анткени бул карыздар кийинки муунга жүктөлөт. Сиздин жоопкерчилигиңиз чоң”, - деп эл өкүлү министрге кайрылды.

Агрардык саясат, суу ресурстары, экология жана регионалдык өнүктүрүү боюнча комитетинин жыйынында "2017-жылдын 25-сентябрында Люксембург шаарында кол коюлган "Агрардык өндүрүштүк сатып-өткөрүү чынжырчасын каржылоо" долбоору боюнча Кыргыз Республикасы менен Европа инвестициялык банкы ортосундагы каржылоо жөнүндө макулдашуу каралды.